正如《一代宗師》嘅名句︰有燈就有人，同樣道理，無論係「豆腐膶」或豪宅，裝修時亦都「有屋就有油」，除咗顏色配搭、施工過程與日後保養，其實早喺油漆種類嘅選擇上，已經大有學問。

分類︰千萬不可水溝油

Step 1.相信好多人都知油漆有油性與水性之分，不過兩者到底點分？

◆ 油性漆用松節水開稀，味道較為嗆鼻，主要用於室外環境；至於水性漆，顧名思義以清水開稀，不似油性漆般嗆鼻，主要作室內髹油之用。

Step 2.何解水性漆最多人用？

◆ 水性漆嘅揮發性有機物（VOC）含量只有油性漆嘅1%，故此唔似油性漆般嗆鼻。更重要嘅原因係甲醛含量比油性漆少得多，有些產品甚至標榜不含甲醛，環保得多又可減低致癌風險。

Step 3.水性漆仲可以點分？

◆ 可以細分為水泥漆與乳膠漆。前者嘅油漆粒子較粗，帶有粗糙感，售價亦較低，多數用於學校、公共地方或室外環境。乳膠漆嘅質地比較細膩，原料等級較高，例如五合一乳膠漆，具有防水、耐擦洗、抗鹼防霉、覆蓋細紋和顏色持久等功能，加上電腦配色，選擇變得五花百門。Lastly but most importantly︰環保與售價掛勾

◆ 即使是相同品牌嘅乳膠漆，不同產品成分各異，其環保表現，以及對健康影響嘅程度都有出入，簡單而言，愈環保、愈安全嘅乳膠漆，尤其是標榜不含甲醛嘅款式，售價愈高，若然家中有小孩或孕婦的話，使多少少錢都值得吧！

 

甲醛︰愈少愈好

Step 1.生人勿近，避得就避？

◆ 市面上有部分油漆含有甲醛，甲醛係一種可燃、無色，會刺激口鼻嘅氣體，已被世界衛生組織定為致癌物質和畸型物質。雖然釋出量會隨時間而漸漸降低，不過假如室內濃度每平方米達0.5毫克，已經有可能令眼晴覺得敏感，長期接觸仲會增加患上慢性呼吸道疾病、鼻咽癌、結腸癌、腦瘤，以及發生細胞基因突變等問題，甚至可能令胎兒停止生長、心腦發育不全、畸形，以至流產，所以絕不鼓勵有孕婦嘅家庭使用含甲醛嘅油漆。

Step 2.狹路相逢點算好？

◆ 所以選擇油漆時，記住留意成份資料，盡量揀含量少，甚至不含甲醛嘅產品。若然避無可避的話，髹油時一定要保持通風，否則會令空氣中嘅甲醛含量增加。雖然坊間有云茶葉有吸附、分解甲醛嘅功效，但仲未有充分嘅科學實證，所以都係以通風為上！

Lastly but most importantly︰咪信偏方

◆ 坊間有講法，教人髹油過後，喺屋內擺放菠蘿、洋蔥、茶葉等，就有吸附甚至分解甲醛嘅功效。以上方法最多只做到辟味，仲未有實質嘅科學證據指出可以分解甲醛；反之因為甲醛原有嘅嗆鼻味道被香氣掩蓋，令人誤以為甲醛已被分解，因而唔再做足通風安排，情況仲會危險咗，所以偏方咪亂信，通風工夫一定要做。

 

顏色︰「誰」是你的Color Right

Step 1.顏色屬性一覽表

顏色	特性
白色	最常用，百搭之選，同色系中亦有不同深淺度選擇。
紅色	予人活力、溫暖、熱情、瑰麗的感覺。
橙色	予人溫馨、窩心、活潑、積極的感覺。
黃色	清新、開懷、有生氣，可以驅走鬱悶的氛圍。
綠色	令人平復心神，並有自然、溫和的感覺。
藍色	予人寧靜平穩、恬適飄逸的感覺。
紫色	既有神秘、浪漫的感覺，亦予人優雅、感性的形象。
啡色	予人復古、沉穩的感覺。
灰色	傾向現代感，運用起來別具靈活性。

 

Step 2.配色3大法

◆ 同色相近︰利用同一色調的深淺顏色作組合，令全屋有和諧一致的感覺，最適合簡約風的愛好者。

◆ 近色相吸︰利用相近的顏色作組合，例如橙色配黃色，效果比同色相近明顯一些又不致過火，讓全屋色調多了層次感，油漆店舖或室內設計公司，都有相關嘅顏色卡紙可供參考。

◆ 出位互補︰大玩對比色組合，例如黑與白、紅與藍，帶出強烈的撞色效果，適合愛另類、作風大膽的住戶外，亦常見於標榜潮流品味的門市布局。

Lastly but most importantly︰營造空間感

顏色深淺可以營造品味偏好外，仲可以喺視覺上調節空間感，例如深色有助營造後退感，淺色就有前進感覺，而淺色嘅天花板就可做到高樓底嘅錯覺。另一方面，選用「倍亮漆」的話，就有集光作用，視覺上令室內空間變得寬敞。

 

施工︰慢工出細貨

Step 1.唔剷底得唔得呀？

◆ 如果你趕時間，budget又捉襟見肘，唔剷底、直接髹新油，尚算情有可原，否則嘅話，都係做足剷底工夫才算王道。原因係原有牆身可能凹凸不平，唔剷底髹新油嘅話，會影響新油漆嘅依附力，令牆身有欠平滑細緻；另一方面，若然新油比舊油淺色得多，唔剷底就好易「透底」。至於剷底嘅具體做法，大體而言係將舊油漆以及底灰一併剷除，再重新「扇灰」，令新漆牆面不會受舊漆質素影響，雖然花費多啲，時間又長啲，不過會美觀得多。

Step 2.髹幾多層先好？

◆ 一般而言，可以選擇髹一層或者三層，前者勝在簡單、快捷、划算。髹三層當然會用多咗錢與時間，不過牆身會平滑得多，因為每髹一次後，師傅會用砂紙打磨，次數愈多，牆身就愈細緻，而且髹足三次，油漆覆蓋性高，唔易見到底色，令新油顏色更見均勻，防水與耐擦程度都高咗，更加耐用，抵番晒！

Lastly but most importantly︰髹底漆咪心急

◆ 想精益求精，最好喺剷底後與髹油之間，加多一層底漆，藉此增加新油嘅依附力，又可減少有害物質釋放。時間方面，要等底漆完全乾燥固化，一般嚟講要等9個鐘，亦有若干新式油漆產品標榜快乾，記住留意使用說明。

 

壁癌︰牆身大敵

Step 1.點解嘅、點解嘅，牆壁都會生癌？

◆ 所謂「壁癌」，係指髹油過後，牆身出現霉斑，繼而多咗白色粉狀或毛狀物，而且蔓延迅速。最大原因係室內環境潮濕，令水氣滲入牆面裂縫，與水泥牆嘅鹼性物質結合而至，不但影響外觀，仲會影響牆身嘅耐用度。

Step 2.有冇得救？

◆ 如果只有霉斑，可試用1:10已稀釋嘅漂白水清潔牆身。若然已有白色粉狀或毛狀物出現，便要改用壁癌噴劑，加上補土及水性防水塗料處理。再嚴重的例子，包括油漆有明顯剝落的話，便先要用纖維刷刮除，再髹上新油漆，揀油前要細閱罐身說明，確保底漆與面漆相容。

Lastly but most importantly︰牆壁有皺紋？

◆ 牆壁起皺並唔係「年紀」問題，大多出於塗層太厚，或者施工時被陽光直接照射，因而溫度太高所至。解決方法就只有重新髹油，並要留意油漆稀釋度與塗刷次數，以及謹記充分攪拌油漆，以免又要剷掉重做。