潔具篇
洗手間可能係全屋最細,但又最難處理,因為多個位置都與水有關,潔具選材上稍有不慎,就會增加滲水、漏水或淤塞等「水災」風險。點先可以化險為夷?揀坐廁、面盆、水龍頭與浴缸時,就可知清楚以下細項,冇得懶!
坐廁︰揀款必知重點
Step 1.揀款前,睇清楚渠位先,「十字批」擰唔到一字坑螺絲嘅道理,你懂的,現時主流嘅渠位布局有……
◆ 低咀:排污喉位置偏低,直徑3吋,並從去水渠嘅圓心計起,離地3.5吋;
◆ 高咀:排污喉位置偏高,直徑4吋,並從去水渠嘅圓心計起,離地7吋;
◆ 地去水:排污喉嘅位置是向地下延伸,離牆身從咀圓心計起9吋或12吋。
◆ 除咗以上3種,市面上仲有其他較少見嘅去水設計,所以又有「自由咀」嘅新款式坐廁出現,加裝風琴喉,就可對應高、低咀嘅渠位。
◆ 唔識分?唔使怕,銀仔、手機幫到手!喺渠位旁邊擺啲幫助辨認大小嘅物件,例如紙幣、硬幣,影張相,再send畀裝修師傳或者裝修建材店舖嘅員工幫眼認認。
Step 2.任何款式都好,最緊要「浸過咸水」?
◆ 香港嘅沖廁水絕大部分係鹹水,腐蝕性強,除咗坐廁主體,水箱零件質素嘅抗腐能力都要高。
◆ 若然坐廁嘅產地係用淡水沖廁,產品嘅抗腐蝕性未必適合香港環境。
◆ 所以入貨時,記住要向店員問多啲!
Step 3.現時流行邊啲款式?各自嘅優點、缺點係……
◆ 一件頭設計︰水箱與坐廁採用一體式設計。
優點︰水箱與坐廁之間冇空隙,賣相完整、高雅,又較易清潔。
缺點︰售價比兩件頭款式貴,維修時要整座處理,麻煩得多。
◆ 兩件頭設計︰水箱與坐廁係獨立成件,屬於市面上嘅主流款式。
優點︰售價比一件頭款式低,維修時可獨立處理,方便啲。
缺點:不過兩件頭之間嘅罅隙容易積藏污垢,清潔時會麻煩咗。
Lastly but most importantly︰正版!正版!正版!
◆ 因為重要所以講3次!原因係只有正版行貨先有原廠保養,而最放心買到正版行貨嘅地方,老土但又貼地嘅答案,就係聲譽好嘅門市或online shop。
浴缸︰大空間之選
Step 1.你個洗手間有幾大先?
◆ 浴缸沖身既得,浸浴更加得,不過洗手間要有番咁上下size先夠位放,如果你間屋真係有咁多size,恭喜你,可以直落Step 2;唔夠大都唔使灰住,不妨跳落「企缸」嗰part睇睇。
Step 2. 現時流行邊啲款式?點解揀款要以人為先?
◆ 矮身浴缸︰又稱裙缸,需要配合大廈嘅去水位。
◆ 普通浴缸︰又稱豬仔缸,外圍冇焗瓷,需要加以裝飾。
◆ 扶手浴缸︰由於要加設手柄,所以比普通浴缸為闊。
◆ 屋企有小朋友或長者嘅話,就以出入方便嘅矮身款式為首選;最後選擇任何款式都好,記住要加設防滑配件。
Step 3.揀款之餘,仲要留意材料喎!
◆ 生鐵加焗瓷款式︰浴缸主流材料之一,好處係耐用度較高,但係比較重,搬運較難,安裝費都比較高。
◆ 亞加力膠款式︰較輕、較易搬;缺點係易刮花、耐用度差啲。
Lastly but most importantly︰安裝費仲貴?
◆ 你冇睇錯、我冇講錯,唔少case都會安裝費貴過浴缸本身售價,因為防水工序特別多,工時又比較長,貪平嘅話,日後漏水維修時仲得不償失。
企缸︰切合本地主流
Step 1.點解係主流?
◆ 梗係土地問題啦!真心講,企缸的確比浴缸慳位好多,較適合香港大部分嘅家居環境,花費都會便宜啲。
◆ 缸身比浴缸矮得多,小朋友或長者都較易出入,加埋防滑配件就更安全。
Step 2.買現成又得,自己砌都得?
◆ 現成底缸︰屬於現成款式,可以喺門市或online shop選購,入貨前記住度好尺寸。
優點︰方便、無縫、易打理。
缺點︰款式選擇較少,尺寸上亦欠彈性,唔夠個人化。
◆ 自行定製︰俗稱「砌缸」,可自行設計及選料,再交由裝修師傅組裝。
優點︰款式選擇多,尺寸與高度都可自己話事,貼近個人喜好。
缺點︰工序較多,花費隨時貴過買現成款式。另一方面,磚砌之間難免有縫罅出現,清潔較為麻煩。
Lastly but most importantly︰小心漏水
◆ 無論浴缸或企缸,貯水與排水量都零舍大,相對而言,漏水嘅風險與嚴重性都特別高,施工時要特別留神!
面盆︰5大款式逐個數
Step 1.有幾多款式選擇?
◆ 主流款式有枱底盆、枱面盆、半枱面盆、枱上盆和掛牆盆四種。
Step 2.選擇款式又與土地問題有關?
◆ 地方淺窄的話,以掛牆盆最慳位,但要加裝鏡箱或掛架作置物用途。
◆ 夠位嘅話,可以選擇枱底盆、枱面盆、半枱面盆或枱上盆,賣相grand啲,又有置物空間。
Step 2.面盆特色逐項數
款式 | 優點 | 缺點 | 注意事項 |
枱底盆 |
• 櫃面不易積水,即使濺水,只需向盆中心抹拭便可輕易回復乾淨。 |
• 連接枱面及面盆的玻璃膠易老化,使用日久容易引致發霉入水。 |
• 需要做櫃。 |
枱面盆 |
• 底盆及枱面之間滲水機會較低。 |
• 櫃面易積水,需勤以索水力強的清潔布抹拭。 |
• 需要做櫃。 |
半枱面盆 |
• 慳位,尤其適合闊度偏窄的面盆櫃。 |
• 櫃面易積水,需勤以索水力強的清潔水抹拭。 |
• 需要做櫃。 |
枱上盆 |
• 物料可用玻璃做,亦有瓷製款式。 |
• 盆底易積水,需勤以索水力強的清潔水抹拭。 |
• 面盆有水龍頭位的話,高身或矮身的水龍頭皆可選擇;否則的話,水龍頭只可安裝在枱面,由於枱上盆的盆壁高度,比枱面盆和半枱面盆都要高,故此必選高身水龍頭,才可方便使用。 • 款式多,備有矮身,以及俗稱「碗盆」的高身款式選擇,後者的視覺效果尤其明顯。 |
掛牆盆 |
• 最慳位款式。 |
• 隔氣喉外露。 |
• 毋須做櫃。
|
Step 3.點解白色才是王道?
◆ 面盆顏色往往與坐廁一體化,曾幾何時,坐廁流行多色選擇,面盆亦都跟風,不過今時今日絕大部分坐廁都係淨白色,面盆亦唔例外。
◆ 白色面盆可謂百搭之選,與大部分牆身及面盆櫃嘅顏色都合襯得到。
◆ 雖然白色不耐污,但正正易於察覺污迹,讓用家容易定位清潔,洗手間當然要時刻保持衛生吧!
Lastly but most importantly︰值得畀多一點點
◆ 撇除浴缸/企缸,面盆可算是洗手間內最eye catching嘅設施,吸引度比坐廁還要高,故此喺budget比例上,不妨對面盆偏心多啲。
◆ 正如上文提及,面盆選擇往往受土地問題影響,最慳位當然係掛牆盆;就算夠位放到其他款式,各種款式嘅大小選擇上,都要因應洗手間空間多寡,小心選擇。
水龍頭︰瓷芯質素成關鍵
Step 1.記住、記住、記住,揀咗面盆先!
◆ 水龍頭嘅尺寸、外觀與出水角度,都與面盆款式息息相關,除咗要注意外觀上是否配合、尺寸是否一致外,仲要留意角度與高度,否則出水時好易濺到面盆外,記住與裝修師傅及售貨員多多溝通。
Step 2.瓷芯就是靈魂!
◆ 大部分水龍頭都以電鍍黃銅製成,款式以單孔為主,而內部嘅瓷芯(又稱「龍芯」)和軟喉最為關鍵,因為經常與水接觸,瓷芯質量高低,直接影響功能與耐用度,道理就如引擎對汽車一樣。
◆ 若然瓷芯質素欠佳,就會較易漏水,進而引致家居水浸。
◆ 以質素論,歐洲名牌製嘅瓷芯,信賴度明顯較高。
Step 3.點解價錢差咁遠?
◆ 實話實說,例如德國、意大利等歐洲品牌,用料、造工與設計都較高質素,尤其是外形in得多,一分錢一分貨,售價自然較高。內地品牌製品亦在港流行,售價亦較為便宜,不過eye catching指數確係削少少,最好選擇瓷芯採自歐洲品牌製品,尤其是香港水壓較高,內地製嘅瓷芯未必承受得住。
Lastly but most importantly︰外國製造?
◆ 唔少品牌都會註明係外國製造(Made in X),不過查察「成份」細節嘅話,其實係購入唔同品牌嘅代工組件,再自行組裝而成。有若干標榜高質素嘅名牌,就會堅持大部分組件,尤其是瓷芯由品牌自家設計與生產,有少數仲係100%全自製,質素自然更有保證。