磁磚、木板與膠板都係常見嘅裝修材料，各有特性之中，何解磁磚嘅泛用性似乎高啲呢？另一方面，「磁磚」與「瓷磚」，到底哪一個才是正寫？相信大部分香港人都約定俗成當作同義詞了，今時今日混為一談亦無傷大雅，不過「地磚」與「牆磚」就一定要分得清清楚楚！

鋪地選材︰點解地磚最大路？

Step 1.用作鋪地嘅磁磚，俗稱「地磚」，除此之外，木板、膠板都係常見嘅鋪地材料，三者有何優點與缺點？

種類	優點	缺點
地磚	• 堅固耐用 • 不怕潮濕 • 防污度高 • 具自然美 • 易清潔	• 售價較高 • 質地堅硬，跌倒在地時較易做成傷痛
木板	• 質感自然 • 暖色怡人 • 質料相對偏軟，有卸力效果，跌倒在地時傷痛較輕	• 易滲水 • 易受冷縮熱漲影響 • 容易凹陷，耐用度低 • 不易打理
膠板	• 便宜 • 質料相對偏軟，有卸力效果，跌倒在地時傷痛較輕	• 外觀欠自然 • 易受冷縮熱漲影響 • 容易凹陷，耐用度低

 

Step 2.地磚都有3D打印？

◆ 不少名牌出品，喺地磚表面都會加入3D打印技術，而且逐漸成為風氣，原因之一可以做出更多變化嘅凹凸質感，其二係做到更多、更複雜嘅顏色與紋理，令同系列嘅每1塊磚都盡量做到與別不同，進一步貼近原石面貌，為家居注入大自然氣息。

Step 3.毛孩主人留意！

◆ 家有毛孩嘅朋友，尤其是養咗汪星人嘅話，木板似乎唔多啱用，因為易滲水，若然汪星人唔生性喺木地板上大小便嘅話，容易滲入木纖維內，比起地磚清潔較難，辟味更難！

◆ 膠板亦都唔係毛孩主人嘅好選擇，原因係毛孩嘅爪容易刮損膠面，久而久之，呢啲「傷痕」就會藏污納垢。

◆ 所以對毛孩主人而言，地磚係最合適、放心嘅鋪地材料。

Lastly but most importantly︰影響深遠，三思！

◆ 傢俬買錯咗，可以換過，不過地磚也好、木板與膠板都好，鋪咗就冇得番轉頭，而且只可以一次過，唔可以resell、reuse，工程大，既花錢亦花時間，所以做決定時唔好一時衝動，不妨向裝修師傅與門市售貨員問多啲、知多啲，當然歡迎喺homemega留查詢啦！

 

地磚︰細數選擇條件

Step 1.撇除顏色、圖案，地磚又有幾多種熱門選擇？

種類	特點
拋光磚	• 光潔明亮。 • 質感平滑。
啞面磚	• 防水迹印。
半拋光磚	• 防滑度高。 • 潔亮程度介乎拋光磚與啞面磚兩者之間，切合主流用家口味。

*除此之外，近年亦流行「過底磚」，又稱通體磚，特別之處在於由面到底，顏色與紋理都保持一致，即使表面有所破損，視覺上都不易「穿崩」，維持原貌，而且防污能力相當高。

Step 2.地板平唔平，同條邊有關？

圓邊

直邊

◆ 無論任何款式嘅地磚，四邊都有圓、直之分。圓邊冇咁易刮腳，施工時亦都較易，赤腳踩落地板都唔會咁易有hard feeling；直邊嘅話，施工時馬虎咗、大意咗，地板就會出現明顯嘅凹凸位，有礙觀瞻，又易藏污納垢，兼且易刮腳，甚至增加跌倒嘅意外風險。

Step 3.磚愈大愈好？

照常理計，磚愈大、罅隙愈少、外觀愈整潔，不過施工時嘅損耗亦會較多，所以裝修時要預多10%面積作損耗之用，變相增加使費，做決定前要計清楚了。

Step 4.高價貨一定質素好？

◆ 未必！就以香港為例，基本上所有磁磚都係進口貨，售價受多方面影響，包括成本、運費與關稅等，所以就算係質素不相伯仲、來貨價又接近嘅兩款磁磚，零售價都會受以上因素左右而有明顯出入，揀選時，最重要都係make sure自己嘅實際需要與外觀偏好。

Step 5. 貨源不同特色各異

◆ 西班牙與意大利等歐洲出品，質素高，價錢都會高啲，論美感，意大利磁磚仲略勝一籌；至於東南亞與內地出品，亦都在港流行，較為注重實用性，性價比會高啲。留意相同地區嘅唔同廠房出品，質素都會有高低之分，不妨打爛沙盤問到篤先做決定。

Lastly but most importantly︰優質必備條件

◆ 無論係哪個地區、品牌嘅出品，優質地磚大多有兩項特色，其一是同系產品嘅紋路較少重複，令磚與磚之間可以呈現多變、自然嘅外觀；其二係密度高，唔只夠堅固，滲水量亦少，耐用得多。

 

牆磚︰分類要清楚

Step 1.牆身都可以鋪牆磚？

◆ 出於美觀，以及易清潔、打理嘅需要，唔少屋主都會喺廚房與洗手間嘅牆身鋪上磁磚，市面上亦有專門對應嘅產品，俗稱「牆磚」。

Step 2.與地磚相比有何分別？

◆ 無論地磚或牆磚，絕大多數都以高溫燒製而成，不過牆磚嘅燒製溫度會低啲，密度亦較低，比地磚易裂，唔適合鋪地板，但勝在重量輕，容易附喺牆身，表面又有防水、防油污的塗層，方便清潔。相對而言，地磚密度高較堅固，不過一般而言重量唔小，鋪牆時會增加施工難度。世事無絕對，亦有設計師喜歡地磚嘅石材質感，選擇作為牆磚物料，為室內營造自然氣氛，不過喺材料重量上，以至施工方法上就要更慎重。

Lastly but most importantly︰

◆ 正常嚟講，洗手間與廚房嘅空間，都會比客廳、睡房為細，不過只要喺牆磚排列略加心思，就可從視覺上增加空間感。原理很簡單，將牆磚橫鋪，可令空間感變闊，直鋪就會變高，大家可因應自家情況作出選擇。